[loksatta]चांदणी चौकातील पुलाला सेनापती बापट यांचे नाव द्या
खासदार सुप्रिया सुळे यांची मागणी
चांदणी चौक येथे उभारण्यात येत असलेल्या पुलाला स्वातंत्र्यसेनानी सेनापती बापट यांचे नाव देण्याची मागणी खासदार सुप्रिया सुळे यांनी केंद्रीय रस्ते वाहतूकमंत्री नितीन गडकरी यांच्याकडे केली आहे. वाहतूक कोंडी आणि सातत्याने अपघात होत असल्याने त्यावर उपाययोजना करण्यासाठी चांदणी चौकात पूल उभारण्यात येत आहे. या पुलाचे काम अंतिम टप्प्यात आहे.
या पार्श्वभूमीवर खासदार सुप्रिया सुळे यांनी सेनापती बापट यांचे नाव पुलाला देण्याची मागणी ट्विटद्वारे केली. चांदणी चौक येथे उभारण्यात येत असलेला पूल मुळशी तालुका, पुणे शहर आणि परिसराच्या दृष्टीने महत्त्वाचा आहे. तसेच हा पूल पुणे-सातारा-बंगळुरू महामार्गावरील एक महत्वाचे ठिकाण असणार आहे.
पुणे शहरातील चांदणी चौक येथे राष्ट्रीय महामार्ग क्र. ४ वर उड्डाणपूल बांधण्याचे काम सुरु आहे. या परिसरातील वाहतूक कोंडी व अपघात यावर उपाययोजना करण्याबाबत राष्ट्रीय महामार्ग प्राधिकरण आणि केंद्र शासनाकडे यापुर्वी सातत्याने पाठपुरावा सुरु होता. यावर चांदणी चौकात पुलाचे काम नव्याने…
— Supriya Sule (@supriya_sule) May 10, 2023
ऐतिहासिक पार्श्वभूमी असलेल्या मुळशी तालुक्यात थोर स्वातंत्र्यसेनानी सेनापती बापट यांनी १९२१मध्ये शेतकरी आणि भूमीपुत्रांच्या संघर्षाची पहिली मोठी नोंद असणारा 'मुळशी सत्याग्रह' केला. या सत्याग्रहाला नुकतीच शंभर वर्षे पूर्ण झाली. या निमित्ताने या सत्याग्रहाचे नायक सेनापती बापट यांच्या स्मरणार्थ चांदणी चौक येथील उड्डाण पुलास त्यांचे नाव देऊन त्यांच्याप्रती कृतज्ञता व्यक्त करता येणे शक्य आहे. त्यामुळे या बाबत सकारात्मक विचार करून निर्णय घ्यावा, असे सुळे यांनी ट्विटमध्ये नमूद केले आहे.
