[maharashtra times]सुप्रिया सुळेंनी घडवलं माणुसकीचं दर्शन
बाईकवरुन चक्कर येऊन कोसळलेल्या महिलेच्या मदतीला धावल्या!
खासदार सुप्रिया सुळेपुणे : अपघातग्रस्तांच्या मदतीला धावल्याने राष्ट्रवादीच्या नेत्या आणि बारामती लोकसभा मतदारसंघाच्या खासदार सुप्रिया सुळे यांच्या संवेदनशीलतेचा पुन्हा एकदा प्रत्यय आला आहे. सासवड-जेजुरी रस्त्यावरून दुचाकीवर प्रवास करत असताना एक महिला चक्कर येऊन खाली पडली. या दुर्घटनेत महिलेच्या डोक्याला मार लागला. त्याचवेळी खासदार सुप्रिया सुळे या तेथून जात होत्या. अपघात झाल्याचं कळताच खासदार सुळे यांनी तातडीने जखमी महिलेला जेजुरी ग्रामीण रुग्णालयात पोलीस वाहनातून पाठवले.
याबाबतची अधिक माहिती अशी की, खासदार सुप्रिया सुळे या पुरंदर तालुक्याच्या दौऱ्यावर होत्या. यावेळी सासवड-जेजुरी रस्त्यावरुन त्यांचा ताफा निघाला असताना अचानकपणे रस्त्यावर एक महिला मोटार सायकलवरून चक्कर येऊन पडली. या प्रसंगी सदर महिलेला मदतीची गरज असताना रस्त्याने ये-जा करणारे इतर प्रवासी नुसते पाहून पुढे निघून जात होते. ही बाब सुप्रिया सुळे यांच्या निदर्शनास आली. त्यामुळे सुळे यांनी आपला ताफा थांबवला.
सुप्रिया सुळे यांनी अपघातात जखमी झालेल्या महिलेची विचारपूस केली. तसेच पुढील उपचारासाठी जेजुरी येथील ग्रामीण रुग्णालयात पोलिसांच्या वाहनात बसवून पाठविले. सदर ठिकाणी असलेले आरोग्य अधिकारी सोनवणे यांच्याशी सुप्रिया सुळे यांनी चर्चा करून महिलेच्या उपचाराबाबत सूचनाही दिल्या.
