[Maharashtra Times]'गौतमभाई माझ्या मोठ्या भावासारखे'! सुप्रिया सुळेंकडून अजित दादांसमोर अदानींचं तोंडभरुन कौतुक

गौतम भाई व प्रीती भाभी हे माझ्यासाठी केवळ पाहुणे नाहीत, तर माझ्या हक्काचा मोठा भाऊ आहे. प्रीती भाभी या मोठ्या वहिनीप्रमाणे आहेत. गेल्या ३० वर्षांपासून आमचे प्रेमाचे, विश्वासाचे नाते आहे,' असे खासदार सुप्रिया सुळे म्हणाल्या.

बारामतीत शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्स या नवीन इमारतीचे उद्घाटन गौतम अदानी यांच्या हस्ते रविवारी झाले. या वेळी डॉ. प्रीती अदानी, विद्या प्रतिष्ठानचे अध्यक्ष खासदार शरद पवार, उपमुख्यमंत्री अजित पवार, खासदार सुप्रिया सुळे, सुनेत्रा पवार, आमदार रोहित पवार; तसेच प्रतापराव पवार या वेळी उपस्थित होते

'अदानी आणि आमच्या कुटुंबाचे गेल्या ३० वर्षांपासून दृढ कौटुंबिक नातेसंबंध आहेत. कधी आयुष्यात चांगली, गोड किंवा कडू बातमी मी हक्काने मोठ्या भावाला (गौतम अदानी) सांगते. ते कधी रागावतात, कधी माया करतात. आमचे प्रेमाचे, विश्वासाचे नाते आहे. त्यांचा सुरुवातीपासूनचा संघर्ष आम्ही कुटुंब म्हणून जवळून पाहिलेला आहे.

'चांगले धोरण म्हणजे केवळ सरकारी निर्णय नव्हे, तर सक्षम संस्था, सशक्त प्रशासन आणि उद्योजकतेला पोषक अशी परिसंस्था उभारणे. भारत आज अशाच एका निर्णायक वळणावर उभा असून, कृत्रिम बुद्धिमत्ता (एआय) ही देशाची चौथी उत्पादन शक्ती म्हणून उदयास येत आहे. बारामतीतून नव्या आर्थिक क्रांतीची हाक दिली जात आहे,' असे प्रतिपादन उद्योगपती गौतम अदानी यांनी रविवारी केले.

अदानी म्हणाले, 'हे केंद्र संशोधन, कौशल्य विकास, उद्योग-शिक्षण क्षेत्रातील सहकार्य आणि स्थानिक गरजांवर आधारित 'एआय सोल्यूशन्स'साठी दिशादर्शक ठरेल. बारामतीसारख्या भूमीतून जागतिक दर्जाची एआय नेतृत्वाची बीजे रोवली जात आहेत. डिजिटल क्रांतीमुळे भारताच्या अर्थव्यवस्थेला नवी दिशा मिळाली आहे. फ्लिपकार्ट, ओला, फोनपे यांसारख्या प्लॅटफॉर्म्सनी मालमत्ता न ठेवता तंत्रज्ञानाच्या माध्यमातून कोट्यवधी संधी निर्माण केल्या. हीच डिजिटल शक्ती आता कृत्रिम बुद्धिमत्तेमुळे नव्या टप्प्यावर पोहोचत आहे. 'एआय'मुळे आरोग्य, शेती, लॉजिस्टिक्स, पुरवठा साखळी, मार्केटिंग आणि आर्थिक समावेशनाच्या क्षेत्रात आमूलाग्र बदल घडेल.'

'देशातील महत्त्वपूर्ण केंद्र येथे साकारले जात आहे. अनेक प्रकल्पाची मुहूर्तमेढ यापूर्वी बारामतीत झाली. आज या प्रकल्पाच्या उद्घाटनासाठी थेट गौतम आदमी बारामतीत आले, याचा मला मनापासून आनंद आहे,' अशा शब्दांत शरद पवार यांनी भावना यावेळी व्यक्त केल्या.

विद्या प्रतिष्ठान येथील कार्यक्रमासाठी संपूर्ण पवार कुटुंब एकत्र आले होते. या वेळी उपमुख्यमंत्री अजित पवार आपल्या जागेवरून उठून थेट शरद पवार यांच्याजवळ गेले. काही काळ दोघांमध्ये चर्चा झाली. तेव्हापासूनच दोन्ही राष्ट्रवादीमध्ये समेट घडण्याची शक्यता आहे, अशी चर्चा कार्यक्रमस्थळी सुरू झाली आहे. 

गौतम अदानी देशात उद्योग क्षेत्रातील एक महत्त्वाचे नाव आहे. अनेक क्षेत्रात त्यांची उड्डाणे असून, त्यांनी शून्यातून सुरुवात केली. देशाच्या २३ राज्यांत अदानी ग्रुप यांचा व्यवसाय आहे. लाखो हातांना त्यांनी काम दिले आहे. यापुढे अनेकांना नोकऱ्या मिळतील, असा विश्वास आहे. 

-शरद पवार, खासदार

बारामती हे परिवर्तनाचे, अमर्याद शक्यता असलेले शहर आहे. हे सर्व असामान्य नेते आणि माझे मार्गदर्शक शरदचंद्र पवार यांच्या दूरदृष्टीमुळे शक्य झाले आहे.

गौतम अदानी, उद्योगपती, संस्थापक अध्यक्ष, अदानी ग्रुप