[Deshonnati]वाल्मिक कराडला बीड कारागृहातून नागपूरला हलवणार? सुप्रिया सुळे यांची मुख्यमंत्र्यांकडे मोठी मागणी

धनंजय देशमुख यांच्या तक्रारीनंतर प्रकरणाला नवे वळण; कारागृहात बेकायदेशीर सुविधांचे गंभीर आरोप

मुंबई : बीड जिल्ह्यातील मस्साजोग गावचे सरपंच संतोष देशमुख हत्या प्रकरण पुन्हा एकदा चर्चेत आले आहे. या प्रकरणातील मुख्य आरोपी वाल्मिक कराड याला बीड जिल्हा कारागृहात राजकीय प्रभावाच्या जोरावर नियमबाह्य सुविधा पुरवल्या जात असल्याचा गंभीर आरोप संतोष देशमुख यांचे बंधू धनंजय देशमुख यांनी केला आहे. या तक्रारीनंतर राष्ट्रवादी काँग्रेस (शरद पवार गट)च्या खासदार सुप्रिया सुळे यांनीही हस्तक्षेप करत आरोपीची नागपूर मध्यवर्ती कारागृहात तातडीने रवानगी करण्याची मागणी केली आहे.

संतोष देशमुख हत्या प्रकरणाची पार्श्वभूमी

मस्साजोग गावचे सरपंच संतोष देशमुख यांचे 9 डिसेंबर 2024 रोजी अपहरण करून त्यांची हत्या करण्यात आली होती. या घटनेनंतर राज्यभरातून तीव्र संताप व्यक्त झाला होता. तपासादरम्यान पोलिसांनी या प्रकरणातील आरोपींना अटक केली असून, मुख्य आरोपी वाल्मिक कराड सध्या बीड जिल्हा कारागृहात न्यायालयीन कोठडीत आहे.

धनंजय देशमुख यांचे गंभीर आरोप

धनंजय देशमुख यांनी बीड कारागृह अधीक्षकांना पाठविलेल्या पत्रात वाल्मिक कराडला कारागृहात विशेष आणि बेकायदेशीर सुविधा दिल्या जात असल्याचा आरोप केला आहे. त्यांच्या म्हणण्यानुसार, राजकीय प्रभावामुळे कारागृहातील नियमांचे उल्लंघन होत असून आरोपीला बाहेरील व्यक्तींशी संपर्क ठेवण्याची मुभा दिली जात आहे. या आरोपांमुळे प्रकरणाला नवे वळण मिळाले असून प्रशासनावरही प्रश्नचिन्ह उपस्थित झाले आहे.

सुप्रिया सुळे यांनी काय मागणी केली?

या प्रकरणावर प्रतिक्रिया देताना खासदार सुप्रिया सुळे यांनी सोशल मीडियावरील पोस्टमध्ये धनंजय देशमुख यांच्या तक्रारीचा उल्लेख केला. त्यांनी नमूद केले की, तक्रारीनुसार वाल्मिक कराड इतर कैद्यांच्या नावांचा तसेच वकिलांच्या सिमकार्डचा वापर करून बाहेरील व्यक्तींशी संपर्क साधत असल्याचा आरोप आहे. तसेच दुपारच्या बंदीच्या वेळेत अधीक्षक कार्यालयातून नियमबाह्य पद्धतीने व्हिडिओ कॉलची सुविधा उपलब्ध करून दिली जात असल्याचाही दावा करण्यात आला आहे.

याशिवाय, बराक क्रमांक ९ जवळील दूरध्वनी परिसरात सीसीटीव्ही कॅमेरा नसणे आणि कारागृहातूनच बीडमधील परिस्थितीवर प्रभाव टाकून इतर आरोपींच्या माध्यमातून दहशतीचे वातावरण निर्माण केल्याचे आरोपही पत्रात नमूद असल्याचे त्यांनी सांगितले.

मुख्यमंत्र्यांकडे केली ही मागणी

सुप्रिया सुळे यांनी या आरोपांची वरिष्ठ स्तरावर सखोल चौकशी करण्याची मागणी केली आहे. त्यांनी मुख्यमंत्री यांना वाल्मिक कराडची बीड जिल्हा कारागृहातून नागपूर मध्यवर्ती कारागृहात बदली करण्याची विनंती केली आहे. तसेच बीड कारागृहातील सीसीटीव्ही फुटेज, कॉल लॉग आणि भेट नोंदवही जप्त करून तपास करण्यात यावा, अशी मागणीही त्यांनी केली आहे.

यासोबतच आरोपीला मदत केल्याचा आरोप असलेल्या संबंधित कारागृह अधिकारी आणि कर्मचाऱ्यांविरुद्ध तातडीने फौजदारी गुन्हे दाखल करण्याची मागणी करत पीडित देशमुख कुटुंबाला न्याय मिळणे हेच प्राधान्य असल्याचे त्यांनी स्पष्ट केले.

प्रकरणाकडे राज्याचे लक्ष

धनंजय देशमुख यांच्या तक्रारीनंतर आणि सुप्रिया सुळे यांच्या मागणीमुळे या प्रकरणाकडे पुन्हा एकदा राज्याचे लक्ष वेधले गेले आहे. आता प्रशासन या आरोपांची दखल घेत वाल्मिक कराडला बीड कारागृहातून नागपूर मध्यवर्ती कारागृहात हलवण्याचा निर्णय घेते का, याकडे सर्वांचे लक्ष लागले आहे.