[ABP MAJHA]फडणवीसांनी मोफत मेट्रो प्रवासावरुन अजितदादांची खिल्ली उडवली,
सुप्रिया सुळे मदतीला धावल्या, 15 लाखांचा मुद्दा बाहेर काढला
पुणे: महानगरपालिका निवडणुकीच्या अनुषंगाने राज्यभरात घडामोडींना वेग आला आहे, तर राज्यातील सत्तेत सहभागी असलेले पक्ष महापालिकेत वेगवेगळे लढत आहे, या दरम्यान त्यांनी एकमेकांवर आरोप प्रत्यारोप देखील केल्याचं दिसून येत आहे. भाजप नेते आणि राज्याचे मुख्यमंत्री देवेंद्र फडणवीस यांनी राष्ट्रवादी काँग्रेसचे अध्यक्ष आणि राज्याचे उपमुख्यमंत्री अजित पवार यांनी पुणे महानगरपालिका निवडणुकीसाठी काढलेल्या जाहीरनाम्यावर आणि केलेल्या मोफत मेट्रोच्या घोषणेची खिल्ली उडवली. त्याबाबत खासदार सुप्रिया सुळे यांना प्रश्न विचारला असता त्या म्हणाल्या कदाचित हा त्यांचाही अनुभव असेल, 15 लाख रुपये प्रत्येकाच्या अकाउंट मध्ये ते घालणारच होते ना, त्यामुळे त्यांचा अनुभव असेल तो, कदाचित असूही शकतो, आमचा अनुभव आणि आमचं काम आहे. आम्ही जे जे शब्द दिले आहेत, ते ते नेहमीच पाळले आहेत, सरसकट कर्जमाफी 70 हजार कोटी रुपयांची ही आम्ही केली होती, त्यांनी शब्द दिला आहे पण त्यांनी अजूनही कर्जमाफी दिलेली नाही, असेही पुढे सुप्रिया सुळे यांनी म्हटलं आहे
तर आज-काल भाषणे कमी झाली आहेत. पण इंटरव्यू वाढले आहेत. महाराष्ट्रात सध्या बघते आहे मी सर्व न्यूज चैनल वरती तेच दिसत आहे, ही लोकशाही आहे प्रत्येकाला मत मांडण्याचा अधिकार आहे मला असं वाटतं महाराष्ट्रात आम्ही बहीण भाऊ किंवा ते दोन भाऊ काय करतात त्याच्यापेक्षा जास्त आव्हान आज देशासमोर आहेत असाही पुढे सुप्रिया सुळे यांनी म्हटला आहे.
देवेंद्र फडणवीस नेमकं काय म्हणालेत?
अजित पवार म्हणाले मेट्रोचे तिकीट मोफत केलं तर हे खरंच शक्य आहे का? या प्रश्नावर उत्तर देताना देवेंद्र फडणवीस म्हणाले आज मी जाहीर करणार होतो की पुण्यातून उडणारी जेवढी विमान आहेत, त्या विमानांमध्ये महिलांना तिकीट माफ केलं पाहिजे, अनाउन्स करायला काय जातंय, अनाउन्स करायला आपल्या बापाचं काय जातंय, यावर उपस्थितांमध्ये एकच हशा पिकला.
पुढे फडणवीस म्हणाले कसंय, अनेक वेळा आम्ही राजकीय क्षेत्रातील लोक आहोत, अनेक वेळा निवडणुकीच्या जिंकण्याच्या डेस्परेशनमध्ये ज्यावेळी आम्हाला माहिती असतं की निवडून येता येत नाही अशा परिस्थितीत आम्ही काही जाहीरनामे काढतो, त्या जाहीरनाम्यामध्ये काहीही म्हणतो पण तरी माझं म्हणणं आहे की किमान पब्लिकचा विश्वास बसेल असा तरी गोष्टी म्हटल्या पाहिजे ज्या आपण करू शकू, असं म्हणत देवेंद्र फडणवीस यांनी अजित पवारांच्या घोषणांची खिल्ली उडवली आहे
देवेंद्र फडणवीस म्हणाले, अजित पवार फक्त बोलतात. माझं काम बोलतं. मी आत्तापर्यंत संयम पाळला त्यांचा संयम ढासळला आहे. १५ तारखेनंतर अजित दादा नाही बोलणार देवेंद्र फडणवीस बोलणार आहे. कुठलाही परिवार एकत्र येत असेल तर मला आनंद आहे. राज ठाकरे यांनी मला क्रेडिट दिलं त्यांचं मी आभार मानतो, त्यांचा मला आशीर्वाद मिळेल असंही फडणवीस म्हणालेत.
राष्ट्रवादी काँग्रेसच्या दोन्ही पक्षांनी संयुक्त जाहीरनामा प्रसिद्ध केला. त्यामध्ये, महापालिकेवर सत्ता आल्यास पुणेकरांना मेट्रो मोफत करणार अशी भलीमोठी घोषणा उपमुख्यमंत्री अजित पवार (Ajit pawar) यांनी केली. त्यामुळे, सर्वांच्याच भुवया उंचावल्या आहेत. मात्र, मेट्रो (Metro) मोफत करण्याचा अधिकार महापालिकेला आहे का, यासह अनेक प्रश्न मतदारांना पडले आहेत.
राष्ट्रवादी काँग्रेसकडून पुणेकरांना मोफत मेट्रो आणि मोफत बस सेवेचे आश्वासन देण्यात आले आहे. पुण्यातील वाहतूक कोंडी आणि खराब रस्ते यामुळे पुणेकरांचे पेट्रोलच्या स्वरूपात दररोज साडे सात कोटी रुपये वाया जातात. अशाप्रकारे वर्षाला दहा हजार आठशे कोटी रुपये पेट्रोलच्या स्वरूपात वाया जातात. त्यामुळे ते पैसे मेट्रोच्या प्रवासासाठी वापरता येतील, असा मोठा प्लॅन अजित पवारांनी सांगितला आहे. त्यामुळे, पुण्यात मोफत मेट्रो शक्य आहे का? असे प्रश्न उपस्थित झाले आहेत.
